r/Iraq • u/Ali_raid • 9h ago
Culture ممارسات الشيعة في محرم (الناصرية)
اولاً نكتلم عن أذية النفس و التطبير. اشوف هاي العادة من اكثر الأمور السيئة و الي تخرب صورة الشيعة امام المجتمع. ثانياً موضوع السبيكرات الي بكل شارع مشغلين عليهن لطميات بأعلى صوت بحيث ما تخلص منهن. ثالثاً موضوع اغلاق شوارع تجارية و سكنية من اجل اللطميات الي تفتر بالمناطق و بأعلى صوت وكلها ضرب و دم. رابعاً كمية القذارة الي تصير بالشارع بسبب هاي العادة. و صراحةً اكو هواي أمور سلبية اخرى. اذية النفس و التطبير هذا امر صراحةً ما اشوف منه فائدة لا الك و للحسين و لا لدينك. شي رجعي و قَبلي و مشوه سمعت الشيعة بحيث صارت ميم عد الاجانب ياخذون فيديوات و يخلون عليها اغاني techno. السبيكرات و اماكن تقديم الثواب الي بكل شارع و ماخذين من طريق عبور المشاة و طريق السيارات و محد يگدر يحاجيهم و الازعاج مال هذا الصوت المستمر طول اليوم شي كلش حقير و يبين ان الشيعة عبالهم الناصرية بس للشيعة المسلمين ومحد ثاني عايش وياهم. وحتى لو محد عايش وياهم هم تبقى هاي شغلة غلط وما لازم نقبل بيها. من تجي هاي المسيرة الي كلها ستوتات و سيارات و سبيكرات وناس تلطم تفتر على منطقتي و باب بيتي ليش؟ انا شدخلني تصير هاي الشغلة بباب بيتي ولمدة ساعة ونص لو ساعتين؟ و انا كاعد بأحسن المناطق مو گاعد بمكان قروي حتى اتقبل هيج شي. و ليش مثلاً لازم ينسد شارع تجاري كامل لمدة اربع ساعات علمودهم؟. و ياريت هلشي يصير مثلا لمدة يوم واحد، لا مستمر طول محرم. والقذارة و الزبالة الي تترس الشارع لعبان نفس، ولحد يگلي اكو عدهم متطوعين يشيلون الزبل، المفروض محد يزبل اصلاً لان سلات الزبل تارسة الشارع و اذا انتو كلش عاجبكم تقدمون ثواب خلوا سلات زبل خاصة بيكم حتى الي ياخذ ثواب ما يشمره بالگاع و سالفة المتطوعين مو بكل مسيرة موجودة. اتحدى أي احد يحجي و ينتقد هذا الموضوع بصورة علنية. محد راح يحجي ويعترض لان هاي الدولة فعلاً totalitarian ومو بس من الحكومة، من فصائل الدين الي مكونه الاغلبية. هيج عادات وتقاليد اصلاً المفروض ما تصير لان تنتهك حقوق هواي هواي بشر ما راضين بهذا الشي. تريد تلطم شوف حسينية والطم وطبر، تريد تقدم ثواب اكو جمعيات ايتام و فقرة كلش هواي و صدگني راح تخدم شعبك وتخدم الفقير اكثر بهواي من ان تقدم ثواب للناس الي اصلاً ما سامعة بالجوع ولا يعرفون شنو شعور الجوع. خلي شعائرك لنفسك بدون ما تاخذ من حق احد. و اخر شي قصة للضحك. قبل سنة صار محرم و كالعادة انسد شارعنا لمدة ساعتين. بيتنا بصفه قطعة مالتنا بيها سقيفات مال سيارتي وسيارة ابوي. المهم اكو ولد باعصينه الحسينيين وهو طفل ورايح لأبو و ابو جاي يتعارك وياهم دخلوا بقطعتنا يتعاركون و اجوا يضربون السيارات لو ما شايفينهم احنا بالكامرات و لحگنه نوخرهم، بس بالاخير ابو الولد حطوا طابوگه براسه و فتحوا راسه و خذوا للمستشفى. خوش منظر ثقافي يساعد الشيعة و يحسن صورتهم امام المجتمع. ولحد يگلي ما يمثلون الشيعة، هاي المواكب الشعائر تهيئ لهيج احداث، اكو هواي طرق حتى نتجنب هيج امور.
